● Portar i Libanon og Syria

Frå ei førjulsreise i Midtausten har me desse bileta:

Ein rasande flott og staseleg trippelport i Beirut!

Frittståande port funnen utanføre Ummayade-moskeen i Damaskus.

 

 Godt nytt år, alle saman!

Ф Russland-spesial: Port og aparte

Den eine halvdelen av Foreininga Portvin oppheld seg for tida i Russlands nest største by, St. Petersburg! Her bur det fem millionar menneske, så ein skulle tru at det var nok av portar. Den gong ei! I nabolaget mitt er det utelukkande gigantiske høgblokker, og lite bruk for inngjerding. Dei gongane eg har funne nokre portar andre stader i byen har eg ikkje hatt med meg kamera, og dei gongane eg har hatt med meg kamera har eg ikkje sett ein einaste port!

For nokre veker sidan kom eg til at eg ville nøye meg med å avfotografere den fine porten utanfor skulen der eg studerer russisk. Det er ein ganske staseleg skule, og ein særs vakker port. Eg hadde tenkt å ha på meg pelslue på biletet, og ville halde eit glas med vodka i staden for portvin. Diverre mista eg pelslua mi på metroen for nokre veker sidan. For ei veke sidan mista eg dessutan kameramannen min, då han vart lei og ikkje orka å gå på skulen meir. Samtlege av dei andre i klassen min er asiatar, og eg har ikkje fått meg til å spørje dei om dei kunne tenkje seg å ta bilete av meg foran porten. Dei forstår korkje engelsk eller russisk. I dag, då eg endeleg hadde bygd meg opp nok mot til å spørje ein tilfeldig forbipasserande om hjelp, var porten jaggu stengt av, fordi dei legg nye rør rett innforbi. Det skal jaggu ikkje vere enkelt!

Om to dagar forlet eg St. Petersburg for å reise til Midtausten, så eg har bestemt meg for å poste eit bilete eg tok av porten åleine for ei veke sidan. Det er litt keisamt med portar utan folk, så eg har manipulert meg sjølv inn i biletet ved hjelp av Paint! Kanskje de kan nytte fantasien og sjå for dykk at eg har både portvin og vodka i veska?

Eg vil også gjerne dele litt aparte med dykk. Nærmare bestemt jule-aparte! Nedanfor ser de eitt av dei mange juletrea som dei russiske styresmaktene har sett opp den siste tida! Det lysegule til høgre er forresten ein port som er så stor at det kanskje ikkje eigentleg er ein port.

Russarane er i grunn meir opptekne av nyttår enn av jul. Det er på nyttårsaftan dei gir kvarandre gåver, og dei har ikkje ferie før 31. desember heller. Dei har ingen julenisse, berre ein figur som liknar veldig. Han heiter Bestefar Frost og har lyseblå kappe. Han har eit barnebarn som hjelper han. Ho heiter Snegurotsjka. Her ser de bestefaren og eit reinsdyr i eit slags sjørøvarskip, saman med eit juletre som også er ei vindmølle:

Russarane er gode på juledekorasjonar! No veit eg i det minste kva alle skattepengane deira går til. Nedanfor ser de tent juletre og eit russisk flagg som vaiar i desembervinden!

På vegne av Foreininga Portvin vil eg ønskje våre lesarar ei riktig god jul og alt godt for det nye året! Eg vonar av heile hjartet mitt at 2011 vil by på minst ei ordentleg synfaring med båe medlemer, ekte portvin i glasa og ikkje minst - flust med portar. På attersyn!

● Ferdaminni sumaren 2010

Nokre portar, nokre grinder, og eit bittelite innslag av vin.

Frankrike, Bordeaux:

Fotografen meinte dette var "den styggaste porten ever", men for Foreininga Portvin er alle portar like mykje verdt. Jaudå, det er godt mogleg det var den første og beste porten eg kom over, og når sanninga likevel skal på bordet; ikkje er det portvin heller.

Lokallektyre i ein fransk port som (om ein no skal fella slike dommar) er hakket finare enn den første.

Noreg, Voss:

Vinen som var med på første bilete, aldeles oppdrukken av underteikna og ei anonym mor. Sørgjande roseknoppar understreker tungsinnet som breidde om seg då siste slanten var faren.

Så då laut me til fjells for å lufta vitet og koma på betre tankar. Her: Sprek grindajenta i aksjon med ei klassisk grind.

Denne grinda var strengt teke før den ovanføre, men det er det jo ingen som veit. Før no. På veg ned att var det større trafikk, og eg fekk halda ope for heile to bilar. Det var stort, sjølv om eg ikkje fekk nokon femtiøring. Det kan jo vera fordi sjåføren i andre bil ikkje kjende til denne skikken, eller tykte eg var for gamal til slikt. (Ho såg ut til å vera yngre enn eg.) Det var jo litt sørgjeleg.

Vel framme på stølen kan eg nærast ikkje få augo - og hendene - vekk frå denne fagre grinda til vedskjulet! Kjærleik, smalaskit og sumarsol!

Sjølvportrett med vedskjulgrinda, godt assistert av ein bjelke og ein spikar. Kreativiteten vil ingen ende ta! God sumar vidare, alle!

● Atter eit attersyn i Bergen!

Onsdag 24. mars baud det seg eit høve til ein aldri så liten photo session ved denne tidlegare omtalte Edgar Allan Poe-porten på Nygårdshøyden i Bergen!

Båe medlemer av Foreininga Portvin poserer frekt framføre smijarnet, den eine med egyptiske handrørsler, den andre som freidig skotsk skulejente.

Det er uvisst kvar portvinsferda vil ta oss neste gong. Kanskje vert det utanriksstoff frå Russland i neste blogginnlegg?

≡ 20. mars: Synfaring i Volda

Nokre vårdagar i mars, då snjoen såvidt hadde byrja å smelte vekk, og medan det framleis var trygt å køyra frå Bergen til Sunnmøre, var det endeleg tid for attersyn i Volda! Foreininga sine medlemer* har vore skilde frå kvarandre om lag sidan krigen slutta. Kva for ein krig vil me ikkje gå inn på.

Den fyrste port me syna fekk! Eit langstrekt og fagert eksemplar i smijarn. Framføre porten poserer Ane i lilla topplue og frekk tights med blomemønster. Ein perfekt kombinasjon! Volda synte seg å ha større port-potensial enn først venta! Portvin takkar Linerle og Ramn varmt for tips og tips-formidling: Det skulle finnast gode portar attmed kyrkja, sa dei!

Ida poserer litt skummelt under Edgar Allan Poe-trea som grafsar så freidig etter kyrkja. Me likte henne godt, ei salig røre av geometriske former. (Merk særskilt samspelet mellom firkanta tårn og rund ende. På kyrkja altså.) Nedi gata fann me ein halvport. Kvar er resten, skal tru? Ane famlar i uvisse.

Jau, bakom avtredet (= doen, dassen, toalettet, wc-et, dritaren) var resten! (Aldri pubertal humor på portvinsferd, aldri!)

I Snippa fann me ein port av det frittståande slaget. Merk det nærast forsvinnande gjerdet nede til venstre, resirkulering, og den kjekke posituren med sekkjen på herdi (= aksla, skuldra).

Så drog me til skogs - det ryktest at der var fine smalagrinder, og den leiken, den ville me sjå! På tur rundt Rotevatnet leita me etter innsjøen si namnesyster Audhild Gregoriusdotter, utan hell. Me ropa og bar oss og skjemde oss ut for andre turgjengarar. Då var smalagrindene lettare å finna. Nedanføre ser me ei nedsnødd grind. Merk bondsk og uvanleg beinstilling!

Nok ein nedsnødd port, og endå ei uvanleg beinstilling oppe på stolpen! dette tok tid og kunne lett gått gale.

Gale gjekk det imedels** ikkje før Ane feilrekna djupna bakom grinda og med eitt vart ståande med snjo til rett oppunder trusa. Brått og uventa! Her fanga i hendingsaugneblinken:

Etter ein slik opplevingsrik tur var det godt å koma seg i (andre sitt) hus og lunka seg på portvin. Fiin gammel sjølvsagt, her saman med mindre attraktiv medlem i foreininga.

Diverre hadde båe to brukt opp si fotogene kvote denne dagen. Me rundar av med eit fint bilete av vinflaska. Til opplysning: portvin til venstre, eit insekt i midten, jerv inn frå høgre!

* Kan det òg heita "medlem" utan ending i ubestemt form fleirtal? Diskusjonen innad i foreininga ville ingen ende ta, endå ordbøker vart konsultert!

** Eigenkomponert nynorskvariant av "imidlertid"!

● Attersyn i Bergen!

Laurdag den 8. august 2009 var fyrste gongen dei to medlemene i Foreininga Portvin trefte kvarandre på om lag åtte månader. Sjølv om attersynet berre varte nokre timar, var det sjølvklart at me jamvel måtte møte ein port eller to! Me møtte ein som me har treft på før, på synfaring i nabolaget på Nygårdshøyden. Og her er den rasande flotte biletserien frå hendinga:

Neste gong vert det truleg synfaring i sunnmørsbygda Volda!

● Vin over grind

Du går fram til mi inste grind, og eg går òg fram til di.

Innanfor den er kvar av oss einsam, og det skal vi alltid bli.

Aldri trenge seg lenger fram, var lova som gjaldt oss to.

Anten vi møttes tidt eller sjeldan, var møtet tillit og ro.

- Halldis Moren Vesaas -

Merk innslag av gardintrapp nedst i siste bilete. Bruk av sjølvutløysar var heilt avgjerande for denne biletserien.

Ф Kairo-spesial: Portar i Midtausten

Den eine halvparten av Foreininga Portvin bur for tida i Egypt, nærare bestemt i hovudstaden - Kairo! Kairo er nokså mykje større enn Bergen både i folketal og areal, og med 20 millionar innbyggjarar er det kanskje ikkje så rart at det er mange portar her òg. Faktisk er det alt for mange portar. Det er slik at ein portentusiast kan verte reint tussete av alle inntrykka. I dette blogginnlegget har ein difor vald å konsentrere seg om portar i umiddelbar nærleik til heimen, i Ismail Ramzy-gata i bydelen Heliopolis.

Her poserer Ane framføre ein arabisk skuleport. Ingen portvin i handa, riktignok, og ingen druejuice heller... Offentleg inntak av drykk, anten han inneheld alkohol eller berre ser ut som han kan innehalde alkohol, er nok ikkje noko ein bør forsøke seg på i Egypt. I alle fall ikkje på ein fredag føremiddag, medan bønneropa gjallar ifrå alle kantar av byen. Her er ein liten port ved sidan av vårt lokale apotek:

Og her er ein grøn port omkransa av arabisk tagging (det står Allahu Akbar, ja), samt bogainvilla (jf. tidlegare innlegg, "Syden-spesial"):


Midtausten byr altså ikkje berre på olje og konfliktar og tull. Her er portar òg!

● Tilstandsrapport: Bergen

Ein port observert og fotografert på veg ned frå universitetet:

Så høg at Ida ikkje greidde å få med heile utan trø ned frå fortauet. Og ein risikerer ikkje livet heller, må vite. (Jaudå, me har vore ute på trafikkert veg før.) Om ein ser vekk frå dagsljoset nedanfor: Ein port Edgar Allan Poe heilt sikkert kunne ha skrive langt og fælt om.

Alt på stell: Rusten port, eføy, og ei helst ubrukt trapp. Merknad: Asfalten er ikkje våt! Kven skulle tru?

● Alle gode ønskje!

Foreininga Portvin vil ønskje all ei riktig god jol og alt godt for det nye året! Halve foreininga flyttar til Kairo i januar, men ein skal ikkje sjå bort ifrå at denne bloggen vert oppdatert med både bergenske og egyptiske portar i året som kjem! Me vonar at 2009 vert rikt på alle vis!

≡ 8. mars: Synfaring til Årstad

Seint, men godt! Her er endeleg bileta frå sist portvinsferd, som gjekk til områda ovanføre Danmarksplass, på sjølvaste kvinnedagen:

Ane gjer ein litt keisam treport meir spanande ved å skape rørsle i biletet.

Ida framføre ein port av det ekle slaget. Me er ikkje sikre på kva det grøne på grunnmuren er, men det hjelper ikkje på inngangspartiet si framtoning...

Denne porten derimot! Pluss for at porteigaren kjeldesorterer papir!

Dans med paraply framføre ein spanande port! Her er både tre og mur representert! Me likar det!

Ida dramatiserer porten sitt estetiske uttrykk. Det vi seie, blomane oppå porten sitt estetiske uttrykk.

Nok ein staseleg port! Legg merke til at stolpane er like dei til porten i bilete nummer 4!

Merksemda vert her retta mot vrengt paraply, og den fra før litt trauste porten kjem utanføre fokus. Bergen by på sitt beste, dette!